DENGUE, AAKYAT SA 80,000 KASO

Sa mabilis na paglobo ng mga kaso ng dengue sa bansa, pinangangambahang umakyat sa 80,000 ang maitatalang kabuuang kaso nito ngayong taon.


Ito ang inihayag kahapon ng Department of Health (DOH) kaugnay ng tumataas pa ring bilang ng dengue patients, lalo pa’t panahon din ng tag-ulan ang natitirang mga buwan ng taon.


Gayunpaman, tiniyak ng ahensya na bagama’t dagsa pa rin ang dengue cases sa mga pagamutan sa iba’t ibang bahagi ng bansa ay wala umanong dapat ipangamba ang publiko dahil sapat ang supply ng kanilang gamot para rito.


Maging ang Philippine National Red Cross (PNRC) ay nagbigay ng katiyakang mayroon silang sapat na supply ng dugo para sa mga pasyenteng tinamaan ng dengue.


Ilang lugar na sa bansa ang isinailalim ng DOH sa dengue watch matapos ideklara ang outbreak ng sakit dito, kabilang ang Western Samar, Davao del Sur at Norte, Cagayan, Marinduque, Ilocos Norte, Pangasinan, Nueva Vizcaya, Isabela, Iloilo, Capiz, Bacolod at Leyte.


Sa huling datos na ipinalabas ng DOH, mula Enero hanggang Hulyo 31, nasa 40,648 na ang dengue cases na naitala nila sa bansa, na may 0.8% case fatality rate o 328 deaths.


Aminado ang pamahalaan na higit itong mataas kumpara sa nagdaang mga taon.


source"abante